聖誕節日到沙田馬會飲茶，聞得四樓旺灣樓有食物美酒嘉年華，加上兒童衣物玩具出售，於是唔執輸，走上四樓睇吓先，一入場就收到抽獎券與飲品券，未買嘢先有着數，但買嘢更有着數，原來名牌雪糕Movenpick有大優惠，用45元買兩球（cone）雪糕，就贈送一套茶具（tea set），內有一茶壺、兩茶杯，仲有三隻茶碟，真係抵到爛，無怪人人踴躍買雪糕攞茶具，何況Movenpick雪糕品質一流，好食到極呢。
下午三時有抽獎嘞，左丁山行吓行吓，睇法意德各國紅酒展銷，突然間聽到自己中獎，獎品係兩枝紅酒，獎品事小，夠運事大，有乜辦法唔笑到四萬咁口。攞完獎品向親友示威之際，俾人拉住，原來係大教授，浸會大學商學院院長張仁良博士，佢與外父外母太太兒子同到馬會飲茶，順便上四樓參觀，張教授話：「外父外母自巴黎來港探內子過聖誕。」佢旁邊有一位英俊、具備迷人眼神、講英文帶法國口音嘅年青人，就是張公子，張教授介紹：「佢在倫敦讀經濟。」如此靚仔，加上講英文法文，有媽咪嘅法國味道，夜晚到蘭桂坊一定吸引無數留學英美，回來度假嘅靚女，張教授要小心則個！
跟住又俾一位大師兄倫兆銘嘅老友，會員L拉住，佢話日日睇「GG細語」，得知有一本書叫做《健康跑步樂》，佢遍尋不獲，問去邊度買？《健康跑步樂》與《健康游泳樂》係由賽馬會慈善信託基金捐助出版嘅，出版社係紅投資有限公司（青森文化），書本上印出嚟嘅地址係灣仔道133號星航資訊中心8樓，電話2540 7517，電郵[email protected]，因除咗會員L之外，已有不少讀者來郵話買唔到，請各位仁兄仁姐直接向出版社查詢，左丁山都唔知道邊度有貨賣。拎住兩枝酒走人，行出旺灣樓正門，一位生面嘅工作人員截住去路，好有禮貌咁要求合照，搞邊科呀？原來被人認出就係每日發噏風嘅左丁山，呢位男士話：「我同女兒每日連讀『GG細語』，難得今日撞到你，希望同你影張相！」又得啫，一於扮聖誕老人，唔托手踭。