要數今年股市的強勢板塊，一定係頁岩氣概念股，安東油田服務（3337）、宏華集團（196）及華油能源（1251），全年累升一至兩倍；傳統的燃氣股雖然冇咁勁，但其實華潤燃氣（1193）、中國燃氣（384）及港華燃氣（1083），都升咗五成，絕對唔失禮。
另一隻燃氣股天津津燃公用（1265），今年都累升一倍，但仍然係落後，何解呢？上文提及的燃氣股，過去兩年股價都係持續向上，而天津津燃卻在2011年大跌，2012年回升，現在只係回到起點。其實佢哋生意做得唔錯，營業額由早年的兩億銀（人民幣．下同），急增至去年的10億銀，今年上半年更已有7.9億銀收入，純利6200萬銀，增長迅速，今年度純利破億應無懸念，可惜公司曝光率一向唔高，冇乜人炒，亦唔見有基金揸多過5%。
上月，商務部批准佢哋控股股東同華潤燃氣成立合營公司，將持有天津津燃的內資股，換言之，華潤燃氣就會成為股東，泊得好碼頭，身價唔應該仲喺呢個位。話說華潤燃氣09年入股鄭州燃氣，兩年後就以45%溢價提出私有化，未來或會用同樣手法收歸津燃，股價企穩1.80元可買入，之後就向兩蚊進發，中長線博私有化。
魏力
http://www.facebook.com/2012jason