英超聖誕快車，一向考驗球隊韌力。現在英超「貧富懸殊」明顯，像曼城這些富豪，28位一隊球員，只有3、4位稱得上是後備，其餘廿位都具正選實力，容許領隊大幅度輪換。故此聖誕快車理應對強隊有利，對弱隊折磨；不過足球有趣的就是，通常應發生的，「通常」都不會發生。
剛過去的拆禮物日，曼聯被看好下，口腫面腫打足10個回合才險勝紐卡素4:3；車仔亦只小勝諾域治；曼城利物浦更輸波收場。上季聖誕檔期，曼聯、曼城、車仔及阿仙奴在拆禮物日開始的3場聯賽，亦全部未能贏多過1場。
相反，今季聖誕檔期，新特蘭遇死亡賽程，球隊名將米高格雷曾表示對完曼城、熱刺及利物浦後取得3分已叫超額完成；豈料首仗便1:0擊敗曼城「達標」。然而，上季在拆禮物日爆冷於強隊身上搶分的球隊，下一場通常都立刻失分甚至輸波。睇吓擊敗利記的史篤城，明晚對修咸頓的命運如何！
拆禮物日還有一個現象，就是球證集體失準。曼聯險勝紐卡素一役，莊尼伊雲斯擺烏龍時，明顯是在防守着越位的柏比斯施斯，怎可把後者當作「沒參與進攻」而計入球有效？球證甸恩下半場亦睇漏高洛仙尼非常明顯的手球。
昆士柏流浪敗給西布朗亦是「沉冤待雪」，門將羅拔格連失第2球明顯被西布朗的麥克科東尼成個人推了入網，球證科爾竟沒吹罰；完場前，西軍後衞列治維禁區內誇張的手球，科爾又睇唔到。唔通班球證個個聖誕party飲大咗，酒未醒就去吹雞？