這幾日在面書見到各位朋友聚在一起食大餐，熱鬧開心非常。又有趁假期出外旅遊，買嘅食嘅玩個不亦幾乎。我選擇這個時候來潑冷水，就是想清醒一下大家頭腦，好好想想節日為甚麼要放假，當中究竟有甚麼意義。
講到最令管理層頭痛頭痕的，莫過於「假前假後綜合症」及「周五周一症後群」的普及與蔓延。何止對公司帶來麻煩，對其他同事一樣不公不便，何其自私又不負責任！我知不服氣的肯定大有人在，病有罪咩唔病得㗎？真係病當然應該休息，但究竟有幾多是真實個案？偷雞扮病然後出去玩還要post上社交網站公諸於世的，大家見得會少？請了病假出去玩被公司中人包括老闆上司客戶撞正都可謂見慣不怪，若要人不知，除非己莫為！
不要講如今資訊科技發達私隱難保，一時口快在同事面前自爆去過邊度威，人家條氣點會順？建立信任信譽關係要經年累月，談何容易？卻非常輕易地摧毀破壞於一旦！這種思想態度絕對壞事兼累事，絕對不能以只是小事一樁視之！
即使真正病到不能上班的，敢問究竟病從何來？是真的唔小心抑或是通宵達旦狂歡、還是計到盡放假當晚坐夜機上班當天凌晨才返，體力透支玩到散晒攰到起不了床？即使真正抱恙在身但不是在家休養攤唞，而是聯群結隊BBQ唱K大食會，病死都冇人可憐。放假不是不應該去玩，只是不可能明知故犯，外出旅遊或者長假期也好，點玩都最低限度要預留一天作休養生息之用。
其實除了肉體，心靈一樣需要放假充電！終日營營役役為口奔馳，除了為生活可還有其他？一家人齊齊整整食餐飯閒話家常，何須頻撲，不亦快哉？
張慧敏
http://www.facebook.com/HKcareerdoctor