亞視近日要求旗下藝人接受洗腦課程，揸弗人王征下旨辭退缺課藝人，已離巢的鮑起靜也狠批娘家此舉過份，近日缺課的蒲進今日堅持再曠課，打定輸數被炒，日前因病缺課、曾指亞視是共產黨的亞姐王家敏為自保，今日會乖乖復課。
亞視上周五冬至狠炒缺席洗腦課程的戚黛黛、張啟樂、陳綺雯和張紫櫻（車車）後，近日又傳出缺課的黃宗澤舊愛甄詠珊、無綫藝員訓練班出身、林峯師兄蒲進以及亞姐王家敏和馮雪冰等，都可能被炒。亞視今日復課，蒲進和馮雪冰堅持曠課，王家敏則表示會上堂。
亞視官網有上載藝員資料，當中較有名的只有陳啟泰、林韋辰及黎燕珊等，昔日亞視鎮台之寶鮑起靜已離巢，但官網仍有其資料作宣傳，至於其他藝人大部份是曾選亞姐或星光幫成員。
對於王征下旨亞視要求藝人上洗腦課程，缺課即炒，鮑姐昨在電話中說：「唔係幾好，係咪有需要唔上堂就炒人，真係有商榷，藝人係請佢返嚟做戲，點解突然要進修，又唔係學校，有啲過份。」鮑姐指跟亞視已沒合約，但不介意自己的資料仍貼在官網。
「作最壞打算」
曾指亞視是共產黨的亞姐王家敏，近日又缺席洗腦課程，記者昨致電她，問可擔心被秋後算賬，她說：「唔會啦，王生（王征）同盛生（盛品儒）唔會咁小器。」她解釋早前因病才請假，今日應會如常上堂：「會返，要炒都冇得怕。」
蒲進今日仍沒打算上堂，他昨在電話中說：「一路都係呢個選擇，都有最壞打算（指被炒），但我有自己原則。」問蒲進萬一被炒有何打算，他說：「冇，我屋企唔係揸住幾億，都要等開飯。」香港電視的王維基揚言願接收亞視棄將，蒲進說：「唔排除任何可能。」
採訪：丁寧
