耶穌誕唱歌、聽歌，最經典嘅當然係《白色聖誕》（冰歌羅士比唱）、《平安夜》（好多版本）……香港經典（因屬空前絕後之作）就係黃霑嘅《慈祥鵬過聖誕》，黃霑早在九十年代已經改變佢嘅六四立場，但點都無法令人忘記佢隻聖誕歌慈祥鵬。
如果想話有乜歌曲代表香港，第一首當然就係《獅子山下》（顧嘉輝曲、黃霑詞），第二首呢，左丁山就認為係台灣人羅大佑醫生嘅《東方之珠》嘞，尤其是呢首係國語歌，在中台港三地都聽得懂。冇法子唔佩服羅大佑嘅音樂天才與觀察力嘅，一個台灣醫生，成為大歌星、大作曲家兼填詞人，登陸香港，竟然觀察入微，譜出《東方之珠》與《皇后大道東》呢首咁道地嘅廣東歌，香港人應該向羅大佑致敬。
一間中學，盛產醫生，呢班醫生又係業餘音樂高手，在母校籌辦音樂會中，就以《皇后大道東》為主題曲（中間略改歌詞，加入「全憑耶穌會」），校長與校友、學生在台上高唱，不知幾興奮，呢個音樂會就係「華仁一家：譚校長＆譚校長」，於十二月二十二日在會展舉行，由袁天凡製作。袁天凡？退休大投資銀行家，《亞洲華爾街日報》曾稱呼佢係The Prince of Finance in Hong Kong噃，做乜音樂會製作人？就因為袁天凡係一位極度熱心嘅「華仁護法」，自九龍華仁（一九七○）畢業後到芝加哥大學讀經濟，飽受芝大嘅通識教育薰陶，好感激耶穌會辦嘅華仁書院（不分九華、港華，總之華仁一家）神父、修士、教師對佢嘅培育，故此名成利就之後，大力支持母校，與一眾校友發動捐款支持香港華仁興建新校舍及九龍華仁擴展，提早達成小班教學目標。呢晚音樂會由譚詠麟做主角，即將退休嘅港華校長譚兆炳為學校代表，故稱「譚校長＆譚校長」，好多華仁校友登台表演，如關黃陳方嘅方俠、德祥地產張漢傑（美猴王馬主）、影星王敏德，鋼琴伴奏有曾浩輝，客串華仁管弦樂隊指揮嘅梁卓偉，為譚詠麟伴奏嘅喇叭手鍾尚志，還有兩隊舊生樂隊，左丁山認出一位band友就係吳天海，果真人才濟濟，皇后大道東上無皇宮，有間華仁就頂住香港半邊天！乜唔係呀？曾蔭權、林瑞麟、孫明揚等都係香港話事人，窩打老道嗰邊就有李柱銘、梁家傑、王于漸、雷鼎鳴、袁天凡，可見華仁雖是一家，港九精神面貌各有不同。