利物浦嘅史達寧雖然得18歲，但已成正選，之前英格蘭仲選埋佢入隊踢友賽，被視為英格蘭嘅明日之星。其實，史達寧喺牙買加出世，住咗6年，今年牙買加足總仲邀請佢效力國家隊。不過，佢拍心口話自己唔會背棄英格蘭，仲話上次代表英格蘭友賽瑞典，簡直係夢想成真！另外，佢嘅利記隊友達寧上場英超踢出身價，據報領隊羅渣士唔會將佢掛牌，真係守得雲開！