白鴿黨一眾大佬為咗落實年輕化，力捧乳鴿羅健熙做副主席，仲為此勸退其他蠢蠢欲動嘅乳鴿，以免分薄票源。不過此舉當然令部份人覺得大細超，唔服氣啦。八方聽聞，卿姐當選主席後，前幾日連同兩位副主席蔡耀昌同羅健熙擺咗餐和頭酒，請鄺俊宇、蔡雨龍等七、八個後生仔食飯兼修好關係。
被召收風須上報
卿姐出名係民主黨黨鞭，佢一加盟就已經整頓黨紀，嚴格執行開會遲到罰錢制，令白鴿黨一眾「要管」嘅男人聞之色變。佢家做咗主席，梗係管得更嚴啦。有白鴿透露，卿姐喺餐和頭酒席間放風，話日後但凡有中央官員搵民主黨人收風，都要向黨上報，否則分分鐘要紀委見喎。
其實白鴿黨過去都有要求黨員，如果有「中間人」接觸都應該上報，但向來冇白紙黑字寫明，所以黨員都當耳邊風，真係上報嘅個案寥寥無幾。家劉主席開到口，相信都會起到一定壓力。第日邊個知情不報就真係豈有此理！
不過八方好奇，中間人要收風都搵民主黨大佬、議員啦，幾時輪到班乳鴿？