今天拆禮物日，麥馬拿文卻提早於上周為大家帶來「大禮」，就是歐聯16強抽籤為大家「抽出」曼聯對皇馬、拜仁對阿仙奴及巴塞對AC的超級戲碼。大家齊叫「咁蹺？有無搞錯？」後，又奇怪明明透過電視直播睇實麥生抽波仔，無理由造馬啩？其實近年歐聯16強或8強常抽出具話題性或強強硬碰戲碼。我雖不嬲係反陰謀論者，但今次卻要改變角色。
先從數學角度分析。今次抽籤中，小組冠軍屬名牌的有曼聯、巴塞、拜仁及祖雲達斯4隊；小組次名則有阿仙奴、皇馬及AC。現在小組次名的3支強隊全數抽中與名牌硬碰，據非正式計算，機會率該低於5分1。
強撼強純屬巧合？
若真是造馬，可怎樣造？雖然直播中看到個個盛着球隊名字的波仔，全部一式一樣，卻可從其溫度埋手，在今次抽籤更容易辦到。因為7支名牌平均分佈在小組首名和次名兩邊，而抽籤方法是先由主持抽出一隊次名球隊，再由麥馬拿文從首名球隊中抽出其對手。只要將4支名牌首名球隊曼聯、巴塞、拜仁及祖記的波波雪凍一點（約攝氏12度，太冷會有倒汗水穿煲），當主持先抽出次名球隊屬阿仙奴、皇馬或AC時，麥生便識趣地選個較冷的波波，強強對碰便順利產生！
當然，以上只是本儍佬胡亂推測。現今社會，破壞誠信大罪嗎？如果志在睇波時讓大家提早在16強興奮點，我是不介意的。
方柏翹
now足球評述員