【記者張嘉雯報道】風很大，溫雲超（北風）領記者到柴灣工業區內的一個公園，記者與攝記相對皺眉，溫雲超卻背着風，紋風不動。住在小西灣的他，說起上次十號風球高懸時，晚上如何一個人跑到海旁追風，「身體咁樣45度都唔會跌親，風吹我唔走㗎，啲風會頂住我。」
傳遞維權訊息，由廣州來港；被拒續簽證，再由香港去紐約。不感覺飄泊，不懼怕國保，千里奔走、萬里呼嘯，北風說，他只為想當一個尋常中國人。
被拒發港澳通行證
溫雲超，網名北風，外表易認，一臉鬍子，像大力水手的情敵布魯圖，北風走在遊行隊伍之中，他也從來沒想過要隱藏自己。
兩年前他來港到傳媒機構陽光國際工作，被警告不要太高調，結果他一次又一次在螢幕上出現，又發起聯署調查李旺陽死亡真相，終被內地拒發往來港澳通行證，明天就要舉家離港。
北風：「之前有妄想過會唔會十八大之後會有鬆動，結果唔係咁，朋友都建議我唔好返大陸，我估佢未必夠膽捉我坐監嘅，不過如果好似對待馮正虎咁，cut咗我網絡、電話，軟禁咁，我完全做唔到嘢咁都唔好。」
今年9月，他了解到前無去路，開始四出聯絡，最終決定往美國哥倫比亞大學當一年訪問學者。
前無去路舉家赴美
40出頭，有妻有兒，問北風可會覺得飄泊嗎？他搖搖頭，表示：「喺中國從事維權嘅人士裏面，我諗我應該算好幸運，起碼有時間、有機會可以嚟香港工作兩年，感受吓香港嘅生活同自由，今次又有機會去美國做訪問學者，相比國內俾佢哋攔住、唔畀佢哋出境，俾佢哋軟禁嗰啲係好好彩。」
北風將遷到紐約，研究新媒體與社會運動的關係，「中東、北非同茉莉花革命都係由網絡開始先，中國社會嘅管制無可能一路咁緊，我哋要諗點樣利用網絡加快民主進程」。
北美有3,000萬華人，他覺得可能是更大的舞台，只擔心家人未必能適應，難為了11歲念小學五年級的兒子，「佢真係好辛苦適應咗香港嘅生活，特別細蚊仔啱啱有咗新朋友又要走，我諗佢哋嘅難度會高過我」。
無悔選擇絕不妥協
值得嗎？「我有不斷問自己，如果我重新選擇過，會唔會好啲呢？你諗吓，當你個好好嘅朋友俾政府無故拘禁，或者突然間失蹤，道義上都有責任要企出嚟講幾句，其實我想做個正常人，係佢哋太反動，先會做成家嘅局面，我覺得完全唔關我嘅事。」
北風硬頸，今年七一及六四前，有人傳話要他低調，又要脅他父母均在內地，「我唔會同佢妥協，你越搵我屋企人我越高調，我唔驚呀，你去機場截我呀？」北風說罷又舒一口氣，「不過可以行遠啲，搵我屋企人都難啲，我自己都會舒服啲」。