長途賽講部署唔講面子，尤其中下型球會，喺頻密賽程下難言場場去盡；用博醜股（藍籌）翌年大翻身嘅投資思維，今晚搵富咸W同維拉下盤，博佢哋返主場迅速反底，自己拆多份禮物。
就算弱雞到似雷丁，畀阿仙奴大炒5:2後，接戰僅作客畀衞冕、兵力更強嘅曼城喺完場前攻入輸1粒；莊家開到[-2]，跟風者以為曼城比阿仙奴更強，再追上盤者一地眼鏡碎。快車期甫開始，維拉同富咸就啱啱分別作客畀車仔同利記共炒12光蛋。先講迎熱刺獲受讓嘅維拉，上仗下半場中段出番完全唔防守嘅技術型中場艾利蘭；小弟覺得領隊林拔唔怕冇面係玩大咗，暫淪為失球負數最多英超隊，季尾護級計得失球就知錯。熱刺上仗畀史篤城守死，兵力當然較厚但作客維拉從來冇優勢；遇對手一眾生牯仔由中後場開始加強掃蕩，熱刺天王加里夫巴利過唔到幾多個，主隊下盤高水可博，冷敲埋和局。
同維拉一樣，富咸上仗開波幾分鐘已畀紅軍攻陷，全場大部份時間游「腳」好閒，呢隊倫敦隊近期傷兵多，幸今返小屋有中場主力薛維爾停賽復出，對住近排又轉沉嘅修咸頓；如果連拜仁雷斯都傷癒，必激活近7場聯賽未入波嘅射手貝碧托夫，搞掂客軍嘅吉田麻也同荷西方迪雙中堅。冷門波膽，博精兵最多嘅紅魔炒紐記，上仗畀史雲斯守和又係成肚悶氣；紐記半弱陣上仗贏昆軍見好勉強，今場喺奧脫福頂多破蛋；大熱紅魔博半冷波膽。文：蘋果波神
（下次見報日期：29 /12）