中聯辦保安出名惡死，加上香港警察經常喺門口充當免費實Q，唔少示威者想將示威物品放入中聯辦範圍，再擺個靚位影幅相都唔係易事。
支聯會噚日就度到條好橋，先將劉曉波相片同示威裝飾掛連接幾個氫氣球，再由支記成員輕輕一推，呢串劉曉「波」就越過一班警員成功闖入中聯辦鐵閘後面，令劉曉波被囚嘅意境活靈活現。
保安手多弊傢伙
點知中聯辦個保安及後手多，係都要將個劉曉「波」推番出閘外，點知唔推猶自可，一推弊傢伙，意外整甩呢串劉曉「波」，令原本飛得唔高，「被囚」中聯辦嘅「波」即時獲釋，飄上半空。有一直因劉曉波被囚笑唔出嘅支記成員睇到呢幕，都忍唔住笑出嚟，話呢次真係多得中聯辦保安推「波」助瀾。