雖然好老套，但我求大俠都忍唔住要講，真係災難無情，人間有愛，一方有難，八方支援！利物浦日前出咗張唱片，叫《正義專輯：他不是負累、他是我的兄弟》，諗住籌款100萬鎊（約1,200萬港元）畀希斯布祿慘劇96名死難者嘅家屬，結果隻碟一出，首周已經賣出近27萬隻，成為聖誕英國銷量榜第一！
為希斯布祿慘劇籌款
呢隻碟除咗有Mel C、Robbie Williams同Paul McCartney等英國歌手義唱，兩大利物浦名宿阿倫漢臣同杜格利殊都有開金口，唱埋一份，所以無論係球迷定歌迷，又或者想做善事嘅人，都蜂擁去買；難怪僅僅出咗一星期就賣到成27萬隻，仲好賣過X-Factor冠軍James Arthur隻碟，做咗銷量榜冠軍！利物浦發表聲明，感謝支持，就連同市宿敵愛華頓都透過官方twitter話：「好消息！《正義專輯》排第一位，愛華頓的所有人在此送上祝賀。」俾人搶走咗銷量冠軍嘅James Arthur都唔介意，仲叫歌迷去買紅軍隻碟，「隻碟值得登上聖誕（銷量）第一！歌好好聽，同埋件事好有意義。」
今年9月，希斯布祿慘劇嘅官方調查報告出咗，話當年紅軍球迷並冇過激行為，件事係警方嘅責任，而佢哋事後仲屈班球迷搞事在先。既然已經證明咗96名遇難球迷嘅清白，利物浦近月一直籌備悼念活動，仲希望籌款畀死難者家屬。除咗出碟，中堅史卡迪爾早前亦幫人紋身籌錢。
另外，利物浦隊長謝拉特趁放假，周日做住家男人，幫屋企人整早餐，但最好笑嘅係謝拉特唔係着圍裙煮嘢，而係扮到成個聖誕老人咁，仲要有隻腳冇着鞋襪！