前晚平安夜，八方有唔少朋友都出咗去街頭派發物資畀露宿者，喺佳節前夕，同低下階層一齊分享愛與關懷。有老友就喺深水埗街頭見到一個詭異嘅畫面。當晚，有幾十位基督徒喺深水埗街頭報佳音，高聲誦唱詩歌，但佢哋眼前，就咁啱有一位露宿者瑟縮街頭。
天寒地凍，嗰群基督徒繼續高聲唱歌傳福音，但近在咫尺有最需要關懷嘅露宿者喺度，佢哋就偏偏當人哋唔存在，眼尾都唔望人哋一下。有人就拍下呢個場景，張相喺網上瘋傳。有目擊者睇唔過眼，認為基督徒報佳音，都係想將福音傳開去，但點解佢哋可以做到同個社區咁割裂？懶理民生困苦，途人都為之側目。