警報！來自日本一行九人、極具殺傷力的海盜船，已正式登陸香港！這是漫畫粉絲期待已久的《海賊王》別注版手機docomo N-02E One Piece！超巨型寶箱內，除了改頭換面的主機，更附送「烈陽號」手機模型叉座，及路飛等全體角色化身的防塵Stick，相信一眾真心Fans，無得唔上賊船了！
記者：陳國輝 攝影：陳盛臣 模特兒：Cherry@Unique
路飛變防塵Stick登船
身為《One Piece》動漫迷，應該無十年都有八年吧！記憶猶新，除了路飛、山治等人一齊經歷的冒險之旅，以及對付過的騎呢敵人外，話題當然仲有探索新世界的海盜船。這次N-02E特別版，就採用獅子頭造型的「烈陽號」作藍本，除了機身印有海盜船Logo，拆開「寶箱」包裝盒，隨即發現長約十多厘米的模型船身，拆散了的船桿，還有船旗等「零件」，玩家只需花幾分鐘自行裝嵌，「烈陽號」立即成形！不說不知，這艘賊船實情是N-02E的手機座，加上附送專用頭之後，立即可變為手機充電座，真係睇得又實用。
但更吸引的，似乎是《One Piece》那幾位英雄！特別版共附送九款角色公仔，包括橡皮人路飛、劍士卓洛、勁Cutie的柏索以及型男山治等，但留意，這些角色除了上色手工細緻之外，原來它還是手機防塵Stick，既可插上手機3.5mm耳筒位當裝飾，平時也可放在「烈陽號」，變身成一件家居擺設。
烈陽號特寫
收錄N-02E主題動畫
既然拆「寶箱」好似中頭獎咁開心，那麼內置在N-02E的《One Piece》元素當然亦很多！開啟手機，已經見到幾秒用作Opening的黑白照，再來是解鎖畫面、分唇掣，統統都是熟口熟面的《One Piece》Icon，就連柏索亦成為主介面上會走會跳的人物，女粉絲見到肯定又大嗌「卡娃依呢」！
但叫我最深刻，首選應該是一段四分鐘《One Piece》影片，該段Bonus以發現N-02E作為主題，雖然齋日語配音兼無中文字幕，但概念勁過癮，對一班煲齊成套漫畫的粉絲們，肯定超期待。
除了看，還可以玩！手機內置一款名為《大劍豪之道》的格鬥遊戲，基本玩法並不像《街霸》那樣又氣功、又超必，它採取一招制勝方法，當畫面出現提示的一瞬間，你就要同電腦鬥快出招，邊個快為之勝，然後仲有一段簡短動畫，用來冧Fans認真一流。
Detail Snap
docomo N-02E One Piece
系統：Android 4.0
處理器：MSM8960 1.5GHz Dual Core
體積：124×64×11.9mm
重量：147g
屏幕：4吋WVGA TFT
主要功能：810萬像素CMOS鏡頭、1080p拍片、支援microSD、IPX5/8國際防水標準、收錄《One Piece》手機遊戲、動漫及漫畫截圖
查詢：三禾電氣（2374 0718）