今年嘅內地聖誕檔期，殺咗部《人再囧途之泰囧》出嚟，上映咗13日，截至前日票房已有7.21億（人民幣．下同），如果加埋噚日嘅票房，如無意外可以破《畫皮II》7.3億嘅華語片票房紀錄。
《人再囧途之泰囧》係前年嘅《人在囧途》續集，當時有香港幕後班底參與，由文雋監製、葉偉民執導、徐崢同王寶強主演，票房有5,000萬，以600萬成本計，部戲係賺到錢。不過，今年拍續集就飛起晒香港班底，徐崢自導自演，搵埋王寶強同黃渤去泰國拍，製作成本1,400萬。
許冠文式喜劇味
論水準，第一集係高班過續集，續集有好重許冠文式喜劇味，對香港觀眾嚟講冇乜新意，但內地觀眾未睇過就好受落，所以票房大爆。家香港製作人喺內地越嚟越難撈，好似陳嘉上當年幫華誼拍完《畫皮》，收咗過2億票房，續集就飛起佢，搵內地導演烏爾善拍，結果票房又係好過第一集。
一元製作室老闆蕭定一噚日就講，香港製作人要喺內地生存要搵清楚自己定位：「內地有啲公司打完齋唔要和尚，香港電影人最好拍啲佢哋唔識拍嘅題材，好似《無間道》同《寒戰》呢類警匪片，或者擁有強烈個人風格嘅，好似徐克、王家衛同杜琪峯咁，要保持香港特色，香港製作人喺內地先有生存空間。」
撰文：馮仁昭