每年工展會市民顧住掃貨，可能會錯過咗工展會小姐選舉同工展小天使比賽。噚日一班10至12歲的工展小天使就食住潮流，爭取路過市民嘅注意。
高級組3號周俊生好似韓國歌手PSY上身咁，戴住「黑超」大跳騎馬舞，睇到台下一班老人家眼定定。11號日本妹妹渡部優奈同拍檔合唱聖誕歌，兩組都成功殺入總決賽。
噚日工展小天使舉行高級組決賽，12人當中挑選6人進入周日總決賽。
經專業教導冇怯場
參賽小朋友全部經新城電台製作人同專業主持教導，面對過千觀眾都冇怯場。一班小朋友演藝能力咁勁，王維基除咗喺無綫挖角，係咪應該諗吓培訓新童星？畢竟小柏林都大個仔結埋婚，係時候要搵一個新一代童星去接班啦！