聖誕節普天同慶，產後的黎姿和陳凱韻（甘比）也齊齊出動！黎姿10月初誕下小龍女Pegella，產後火速收身，前晚索爆的她帶孖女聖誕shopping開心過節。大劉劉鑾雄女友、33歲的甘比上星期剖腹誕下8磅兒子，想不到生完未夠10日，昨日已出動去福臨門食飯，未坐完月加上天寒地凍，甘比包到冚頂硬上湊女，要得寵真是不容易！
甘比陳凱韻08年為劉鑾雄誕下女兒秀樺，精靈的囡囡深得大劉歡心，母女得寵程度大增。再度懷孕的甘比上周日在跑馬地養和醫院剖腹誕下8磅重兒子，以一子一女追平呂麗君，有指大劉再添丁開心又激動，連日探望甘比和囝囝「mini Lau」。
秀樺得嫲嫲歡心
大劉一家昨日在灣仔福臨門食午飯兼過聖誕節，剛剛生完仍在坐月的甘比也未能倖免，要齊齊出動。中午12時多，大劉陪住甘比、甘比女兒秀樺及甘比媽咪，一同坐1M1SSU車牌的七人車到達，生完只有九天的甘比全身黑色包到冚，見她穿上羽絨褸、雪靴和毛毛頸巾等，只有Hermès橙色Kelly bag最搶眼，甘比面容依然浮腫，更有泛紅和油光的產婦feel，但看來精神不錯。
甘比落車時小心翼翼，慢動作移動，明顯怕整親傷口。至於大劉在另一邊落車後，馬上走去接甘比，甘比之後拖住女兒秀樺一齊行，及後大劉媽媽、大劉妹妹及細劉劉鑾鴻等陸續到達，而大劉大女、在紐約大都會博物館工作的劉秀融（Jade）原來也回港過節，看來消瘦了的Jade帶了鬼妹朋友參與家人飯局。問她有否見過新弟弟？Jade就不作回應。
大劉一家12口在福臨門吃了一個多小時，離開時他們站在大堂吹水，甘比女兒秀樺特別討人歡心，嫲嫲不停拖住乖孫，又摸她面仔、捉手仔，又傾又。之後眾人分頭離開，大劉繼續陪甘比，而甘比媽全車更坐了五人，連司機六人，有超載之嫌。其實甘比上一胎生完，同樣未坐完月就出動陪大劉食飯，但當時休息了大約20日才出街，今次只是9天就出動湊女陪大劉，明顯辛苦得多。
黎姿孖女最Pink
另一位靚媽咪黎姿近月也生第二胎，她10月初誕下小龍女Pegella。前晚平安夜，黎姿帶了孖女Pricia及Gianna、兩名傭人及女友人到中環ifc逛街，富商丈夫馬廷強未有同行。生完兩個多月的黎姿，已極速回復苗條身段，孖女則齊齊穿上粉紅色褲仔，戴上聖誕帽和蝴蝶結裝飾，樣子甜美可愛，深得靚媽咪遺傳。
黎姿原本等到停車場，見記者拍照即有點驚訝說：「突然咁多人嘅？」更一度想走避，兩名傭人也抱起孖女準備閃人，但孖女表現淡定，更不時望向鏡頭，黎姿之後也大方保持微笑，透露外出買聖誕禮物。問送甚麼聖誕禮物給孖女？黎姿說：「冇乜特別。」孻女Pegella是否在家？黎姿說：「係呀，家返去啦。」
採訪、攝影：林嘉慈、盧妹、陳慧安