今年香港體壇生咗好多龍B，大部份都係生女，連遠在英國比賽嘅香港桌球「1哥」傅家俊（上圖，Marco）也趁熱鬧，同太太Shirley嘅愛情結晶上周六喺寒冷嘅英國出世。整個生產過程陪伴在側嘅Marco卻暖在心，榮升爸爸後，他用「百感交集」來形容自己嘅心情，佢話：「現在知道『母親』這詞語很沉重，如果沒有這種經歷，永遠不會知道父母恩。」
轉眼間，原來當初嘅「神奇小子」已唔係「小子」，下月8號就滿35歲，難怪舊年5月先結婚嘅佢，咁急生B；咁高興嘅事，Marco第一時間將喜訊放上微博，由於太太陣痛14個鐘BB都未出到嚟，最後因BB心跳加速，醫生決定剖腹，全程陪住太太嘅Marco真心痛，幸母女平安，BB重7.4磅。
老婆囡囡留英半年
不過，一家三口暫時唔會返香港，一來太太要坐月，二來Marco下月有兩個比賽，聽講Shirley已計劃留英半年，相信係想遷就未來幾個月仲要喺英國打比賽嘅老公！Marco下一個比賽，係下月12日喺設菲爾德舉行嘅中國公開賽外圍賽，之後係1月底要到柏林參加德國大師賽。Marco當然想喺英國陪太太同囡囡啦，之但係佢2月底要去中國打海口世界公開賽，點都要返嚟亞洲一趟。
屈指一數，三鐵代表李致和兩公婆今年6月生咗個女，之後滑浪風帆夫婦何智豪同陳慧琪又喺今個月8號生咗對孖女；連埋今次Marco個囡囡，今年香港體壇出現4個B女。