咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
意大利甲組足球聯賽今季全面消失於收費電視直播頻道，以直播足球賽接近氾濫嘅香港，對不少球迷嚟講，或者就好似5星級酒店自助餐，少放兩碟海南雞，喺生蠔、魚生、和牛等貴價美食當中，根本冇人會吼，但以意甲陪伴成長嘅小弟，或多或少都真係有啲空虛。
小弟偶像係施丹，中學同大學時期，其實睇意甲比英超仲多，朋友間談論曼聯、阿仙奴爭霸，我仲笑佢哋唔識波，唔識欣賞當時最講戰術同技術性嘅聯賽。當然意甲呢幾季都死死哋，多得淫蟲總理搞衰AC，羅馬、拉素又輪流財困。祖記因假波案降埋班，元氣大傷；加上國內經濟唔好，中小型班更出現拖糧等情況，費倫天拿都沉過一排，但就始終一如自我，貫徹主攻風格。
紫百合夠正氣
講紫百合最光輝時代，自然係「戰神」巴迪斯圖達、雷哥達斯等領軍時代，呢幾季都只係中下游，上季排第13，連歐霸盃都冇得玩。好彩由前羅馬射手、「飛機仔」蒙迪拿領軍，費倫今季大有起色，上仗大炒巴勒莫，壓過國米升上第3，下季歐聯有機會見番佢哋。世界潮流近年興番3後防，其實費倫一向都係3後衞忠實支持者，史提芬沙域證明曼城唔要佢，係曼城嘅損失；中場大衛比沙路同阿古蘭尼亦都係英超失意，都大打爭氣波，前鋒組合東尼同祖維迪一剛一柔，化學作用都唔錯。咪睇東尼35歲人，回流費倫一樣有貨交，但唯一擔心費倫財政都唔係幾好；祖維迪23歲當打之齡，打得越好，季尾被賣走機會就越高。但點都好，正氣足球，始終有佢哋嘅捧場客。文：牽牛