咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
皇馬唔掂，唔少網民都提過摩連奴嘅3年魔咒，即係摩佬教波，頭兩年勁，但一到第3年，隊波就開始下滑。既然個個都咁講，就由波圖睇番摩佬嘅戰績。
佢喺02年初教波圖，隊波即刻番生，半季就衝上第3，直到04年攞歐聯，摩佬維持咗波圖嘅強勢兩年半。04年夏天，加盟車路士，連奪兩季英超，都符合大家所講嘅威足兩年，去到07年4月，車路士狀態回落，勝率大減，聯賽失分，俾曼聯攞冠軍，歐聯亦俾利物浦踢出局；喺07年8月開季，車路士仍然麻麻地，到9月摩佬就離開球隊，計計埋埋，摩佬喺車路士嘅盛世維持到兩年8個月。喺08到10年嘅兩季，摩佬教國米，結果兩季都好成功。
摩佬喺10年夏天開始教皇馬，頭一季攞西班牙盃，上季就更加以100分捧西甲冠軍，威咗兩年。計埋今季上半季，摩佬教咗皇馬兩年半；若果現實真係歷史嘅循環，摩佬嘅球隊又嚟到衰落嘅時間。
睇番摩佬被車路士炒魷前嘅新聞，嗰陣球隊傷兵滿營，艾辛同波歷克呢啲主將都要養傷；而喺摩佬被炒後，佢話球隊有「二五仔」篤佢背脊，後尾仲有傳係隊長泰利㖭。就咁睇，第3年衰落、傷兵問題、內訌係摩佬離開車路士嘅原因。
咦！係咪有啲熟呢？皇馬今季啲左閘同前鋒輪流傷；至於內訌問題，西班牙幫一直同摩佬打對台，同埋個勢越嚟越嚴重；伴隨佢教皇馬第3年成績下滑，帥位可以話岌岌可危！不過，我覺得皇馬至少會等埋場歐聯16強先。家炒摩佬，對曼聯真係輸咗9成，既然係咁，不如畀個機會佢，係炒都係等歐聯出局先炒！文：咖喱