末日過咗，平安夜一樣咁平安，聖誕正日想出街Hea又怕逼，港九依然有大把無封路兼「避逼」靚位過二人世界。雖然維港燈飾買少見少，不過一鏡一紙，依然可自製浪漫。
記者：徐影龍 攝影：周旭文
模特兒：[email protected]
周街Super Star
遇着聖誕、情人節呢類日子，同一班陌生人逼嚟逼去，邊有浪漫可言？不過點逼都好，有車之人點都叫有多啲選擇。唔講咁遠，先落夜晚最燈光璀璨嘅中環，最佳Hea位有舊天星碼頭多層停車場，除咗放煙花，基本上全年365晚都必定有車位，最正係天台，一邊望維港一邊望住中銀、滙豐等特色建築物，OK浪漫㗎。雖然今年中環燈飾弱過上年，不過只要利用四周燈多過人嘅特色，加個彩光Filter，相中人物便會如被群星包圍，好Fantasy。停車場7pm後只收$14/h，夜泊都只係$50，同伴侶靜靜談完心，跟手落老蘭Join班Friend都咁就腳，玩完先攞車好過泊街啦。
揸車點行？
喺干諾道中左轉入愛丁堡廣場便可。
銅鑼灣僅餘靚位
港島區有大量填海工程，令過往皇后碼頭、油街等睇尖嘴燈飾靚位消失晒，雖然銅鑼灣避風塘都係遮到密不透風，好彩隔籬遠少少仲有一列停車位，對面有維港海景，左望亦有中區燈飾，肚餓仲有信記避風塘炒蟹㖭。
揸車點行？
由告士打道駛至維園道，過左怡和午炮，面前左轉入小路便可。
無敵海景氣氛一流
九龍區大把僻靜地方Hea，但講望到最靚維港夜景，都係西九龍海濱長廊最正。泊好車，行出緩跑徑，無敵大海景即呈現眼前，加埋一支支燈柱，氣氛絕對一流，最重要係無公共車輛去到，人多極有限。
揸車點行？
在柯士甸道駛入柯士甸道西，往海邊直駛，穿過兩個迴旋處再左轉順行。
靚橋景勝在夠靜
維港景睇到悶？不如去遠啲，直入機場核心計劃展覽中心，影吓汀九橋同青馬大橋都唔錯。十幾個咪錶位好少人泊，連街燈都唔多，夠靜兼夠黑，睇住條穚談心，唔怕有人騷擾。
揸車點行？
在荃灣海安路接入青山公路汀九段，即係入屯門、深井嘅下路，行四公里靠左轉入便到。
散景砌出心思
唔玩彩光鏡，龍友界都有一招興咗好耐嘅「散景造型」。喺鏡頭前加塊不透光卡紙，中間偷空形狀就係散景光點嘅造型，效果好神奇。不過鏡頭要在中長距下、光圈仍夠大先玩到。
X1慳遊港九
寶馬1系大賣，連帶X1都有不少捧場客，長測咗四日，令我明白佢受歡迎原因。拎到環保稅令車價吸引係其一，入門級車有齊電控椅同電天窗，比想像中更豪華。八速Steptronic波箱，有埋軚盤+/-波，加埋TwinPower Turbo，玩樂性好足夠。值得留意自動熄偈功能，當踏Brake約兩秒便啟動，在市區為主嘅路程中，引擎在燈位開關較密，幸好着偈時「打冷震」唔明顯，亦不會斜路溜後，最重要係四天近300公里用不到一半油，的確幾慳油。
BMW X1 sDrive 20iA
售價：$347,500
查詢：3129 9000（BMW HK）