又到聖誕，又到球迷睇好波的時間！因為在這個傳統節日，NBA將由香港時間26日凌晨起，上演一連串大戰，今年依舊連打5場，由深夜1時上演的網隊對塞爾特人打頭陣，之後是湖人對紐約人、熱火對雷霆、公牛對火箭，以及守尾門的快艇對金塊，打完該仗已是下午2時了。
聖誕佳節狂歡盡興，加上天氣寒冷，要捱夜睇足5場難如登天。從戲碼上來看，「孖人」大戰及之後的熱火對雷霆，相信會吸引到較多球迷；勒邦占士及拜恩是這個聖誕大戰的常客，近幾年通常都會見到兩人的身影，包括10年熱火作客湖人的大戰。
記得那天只得約10度，我參加了HK-Kicks辦的睇波團，5時多包到像糭般出門，在旺角的波鞋舖和一大班人邊食老麥早餐，邊睇這場Nike巨星決戰；主辦單位還請到黃興桂到來講兩嘴，實在是有今生，無來世。可惜該仗湖人大失水準，中段已被熱火拋離；而拜恩的27分，亦被占士的「3雙」比下去，最後以80:96大敗，全沒有打崩頭的激烈氣氛。
不少NBA教練和球星，都對聖誕尚要比賽有過微言，如前魔術教練史坦雲根迪就試過因此而罰款。其實對普羅大眾來說，一家大細入場睇波，可說是上佳娛樂；就如英超每年都不歇冬，並在快車期間上演兩場比賽，就是以往讓低下階層在佳節可以入場，普天同慶；一眾年薪千萬的球星，在這日子辛苦一點也應該吧。
NBA由1947年起（除98年lockout），亦是每年聖誕都會打波，最多更試過打7場；而08年起則固定為5場。今年熱火對雷霆的大戰，又是在清早6時半上演，而HK-Kicks又會再辦睇波團，之後仲會有籃球比賽；看來我又要「玩命」，由凌晨1點睇到9點，之後再打幾場波，過一個籃球聖誕！文：仙道彬