隔牆有耳：
冰雕雪人陪企鵝過聖誕 - 李八方

香港夏天熱辣辣，冬天就算跌破十度，嚴格嚟講都唔係好凍。海洋公園近年引入咗企鵝等冰極動物，今年第一年喺香港呢個咁熱嘅地方過聖誕。

為咗令佢哋有一個開開心心嘅冰極聖誕，海洋公園整咗兩座晶瑩剔透得嚟又色彩繽紛嘅冰雕雪人陪企鵝一齊玩，等小企鵝都可以感受吓聖誕氣氛。呀，順帶提句，企鵝係生活於南極㗎！
唔單止企鵝鍾意冰雪，園內育有世界體形最細嘅猴子侏狨，工作人員送咗個同佢哋體形一樣大嘅水果雪人畀佢哋做聖誕兼一歲生日禮物，今次真係可以食餐飽咯！海洋世界就一向相當神秘，為咗搞吓聖誕氣氛，佢哋就派咗聖誕老人潛入水底餵魚，等佢哋都可以擦番餐聖誕大餐。