昨日被喻為本世紀最冷的平安夜，情侶們暖笠笠迎佳節，前晚林子祥兒子林德信拖新歡黑絲索女玩買餸煮飯仔見家長，正式撇甩緋聞女友吳雨霏和王秀琳，佳人有約的林德信在街上等女友時，竟興奮到飛甩靴，認真爆！而風流富商趙世曾就一王兩后開餐；名模楊崢和老外男友十指緊扣逛街，戀火高燒。
【跑馬地】現年27歲的歌手林德信除了繼承老竇林子祥的音樂才華外，還跟老竇一樣風流倜儻，由於他生得靚仔又有風度，待人接物又有教養，故勁受女性歡迎，雖然入行短短一年，但身邊女伴好似走馬燈團團轉，先後跟同唱片公司的歌手吳雨霏（Kary）、王秀琳傳緋聞，又多次被影到跟不同圈外女伴睇戲食飯，一網打盡圈內圈外女性，果然人不風流枉少年。
新女貌似郭晶晶
前日平安夜前夕傍晚約5時許，本報記者發現林德信在老竇林子祥和繼母葉蒨文的跑馬地屋企附近出現，戴了紅色耳筒的林德信十分搶眼，他一支公去櫃員機撳錢，之後行去路邊等女友，不過就行得好招搖，竟然有行人路唔走，偏偏要危行馬路邊，行行吓他突然飛靴，估計短靴size太大鬆脫，林德信尷尬到勁儍笑，匆匆執番隻靴穿好，途人都指指點點，認真爆。剛巧他的長髮新歡到達，目睹男友飛靴瘀事，兩人笑着離開，這位穿黑絲的長髮妹樣子斯文，輪廓有點似霍家新抱郭晶晶。
林德信接了黑絲索女後結伴到超市買菜買肉，不過林德信警戒心甚高，不時走出門外張望有否被偷拍，最後女友埋單買了三大袋餸，林德信才再走近身邊幫手，兩人漫步行返林子祥屋企，似乎是玩煮飯仔見家長共迎聖誕。
身邊女伴車輪轉
林德信年少多情，去年底開始跟Kary傳緋聞，當時Kary被影到戴口罩和帽遮掩，偷偷去林德信於中環的屋企過夜，隨着Kary跟網球王子洪立熙復合而緋聞告終。今年2月，林德信又被影到跟另一名長髮女到圓方睇戲食飯，7月再被發現一拖二到上環食西餐，10月就坐王秀琳戰車夜蒲蘭桂坊，不過，林德信一律否認所有緋聞，但就曾被葉蒨文踢爆聽到他在家中細細聲跟女友傾電話，十分鬼馬。
採訪、攝影：陳辰、楊浩賢、朱志明