永興油行自行溝油，涉溝出含有致癌物質食油，至少13間食肆中招，報道出街後生意大減。飲食界議員張宇人（Tommy）都話，連佢太太都收到外國朋友傳嘅WhatsApp短訊，「提醒」佢唔好幫襯。不過Tommy話冇有怕，噚日黑超look現身，帶傳媒去其中一間中招用咗永興油嘅嘉豪酒家食餐勁，為業界打打氣。
張宇人試食打氣
嘉豪酒家負責人陳祥佐噚日同八方呻，自己幫襯永興廿年，都唔知對方會亂溝油，佢強調唔係慳錢入平價油，因為永興畀佢嘅價同香港老字號合興獅球嘜食油差無幾。佢一知啲油出事，已銷毀問題食油同食物；而早前食環署抽驗過，佢舖頭嘅食油都合乎標準。但消息一傳十，十傳百，仲有人狂傳WhatsApp點名話邊間食肆用地溝油，會食死人，結果生意大跌五成，惟有向Tommy求助，澄清一下。
Tommy噚日開飯前先申報利益，佢話近年有搞生物柴油生意，專回收食肆廢油，佢發現好多人同佢搶購食肆廢油，「佢哋又唔合資格做生物柴油，唔知買嚟做乜」。咁會唔會回收加工做食油㗎？佢話真係不得而知，但食落肚嘅嘢應該睇緊啲，直斥政府難辭其咎，1月復會之後會諮詢業界意見，研究有冇需要修改法例，規管入口食油，本地嘅供應商都要一併監管，食環署亦要定期抽查。
mailto:[email protected]
