餐廳R一年一度請吃聖誕午餐，席設太古廣場Domani，準時入到去，只見餐廳三分之二俾一間公司包咗，食客中靚女如雲，少見也，問清楚，原來係Dior職員慶祝聖誕，食到掌聲雷動，鬼咁happy，大概是日（二十一日冬至日）下午唔駛開工啩。餐廳經理係意大利人，對我哋講：「大家慢慢享受，喺我意大利鄉下，聖誕前午餐一定食足三個小時！」
可惜呢度係香港呢，食咗兩個鐘頭，已經三點，仍未見甜品，餐廳R係主人，話要走先去見銀行家，左丁山趕住放假前交稿，亦匆匆告辭，位意大利經理一定心諗你哋香港人唔識享受，咁鬼擒青做乜。或者係嘅，只有在香港，才會有銀行家與餐廳東主要在聖誕前爭取時間見面，唔肯等到假期後嘅唧。
匆匆走返寫字樓寫稿，記得早上睇霍士電視節目，內有一環節，主持人Sean Hannity訪問一位美國無神論者，並非討論耶穌基督，而係呢個無神論組織在紐約市掛出大型廣告牌，牌上有耶穌模樣肖像，口號有兩句：「Keep the Merry, Dump the Myth」（留住快樂，掃走迷思）！意思就係講聖誕（老一派非教徒稱為耶穌誕）可與耶穌無關，但即使非教徒如左丁山都知道，聖誕（耶穌誕），就係與耶穌牢不可分，怎麼可掃走耶穌迷思呢？唔怪得基督徒Hannity與呢位無神論者互相爭辯開火。美國有一派人士（前衞人士）認為唔應該講Merry Christmas，只應講Happy Holiday，以免沾上宗教色彩，其實係過份政治正確，當初如無耶穌生辰紀念日，何來十二月二十五日要放假，等歐美人士有一個「快樂假期」吖。
放長假期做乜好？不如讀書啦，朋友送咗兩本書嚟，算係聖誕禮物，一本係鍾月萍博士嘅新書《人人八字》；另一本係英文書，書價昂貴（50美元，朋友自矽谷帶返）嘅《Political Public Relations : Principles and Applications》，一本易讀，一本難啃，索性一齊帶返屋企，試吓交叉閱讀，希望學到啲好嘢！