曼城前鋒巴洛迪利出名麻煩，佢細佬以諾都唔係好人，上周日佢蒲吧期間同其他人爭執後，仲出手打調停嘅警察，家被警方拘捕，更唔可以保釋，平安夜要喺拘留所踎。而巴神報稱因流感，缺陣上周六對雷丁嘅聯賽，結果被英國狗仔隊踢爆賽前蒲天光；曼城總監碧格利斯坦講明下年1月第1收購目標係禾確特，擺明想踢走巴神。
蒲吧搞事冇得保釋
巴洛迪利出身貧窮，由意大利籍養父母帶大佢，佢對親細佬以諾（Enoch Barwuah Balotelli）都好照顧，年初送咗部過百萬嘅波子過佢，又幫19歲嘅以諾搭路去英格蘭搵食；但喺曼城、史篤城等球隊試過腳都冇人要，家回塘意大利，喺熱拿亞市一支丁組球隊保利亞斯高落班。
以諾恃住有個球星大佬，喺意大利就蝦蝦霸霸，周日佢同一班朋友喺布雷西亞一間酒吧狂歡，同隔籬枱發生爭執，酒吧立即報警；警察到場後試圖平息爭執，但幾杯屎水落肚，以諾竟然出手打警察，結果因為暴力行為及襲擊公職人員等罪名被周，聖誕流流要係拘留所踎。
巴神去wet曼城搵禾仔
以諾被告，佢大哥都係唔生性，上周六主場對雷丁嘅聯賽，巴神話因為流感冇落場，但佢架迷彩賓利，就被發現上周五晚泊喺曼市蒲點，令管理層對佢更心淡。有傳曼城已準備收購禾確特，並希望用2,000萬鎊賣巴神去AC，但家領隊文仙尼仲企得好硬，堅決唔放，到時睇吓碧格利斯坦同文仙尼邊個牙力夠。