《城市論壇》有班撐特首梁振英的「愛港」阿伯、阿姐，專門狙擊泛民講者，噚日討論監警會公佈李克強事件覆核報告，《城壇》阿伯連監警會秘書長朱敏健都唔放過。當記協主席麥燕庭同人權監察總幹事羅沃啟都俾阿伯圍攻，但係「愛港」人士對「新仔」朱敏健究竟是敵是友，一時都搞唔清楚。喺節目開始前，朱敏健介紹吓監警會背景，不過「愛港」人士最關注嘅竟然係，呢個會有乜政黨背景？乜人選佢出嚟？呢吓真係考起朱敏健，佢唔太肯定咁話，委員包括民主黨黃碧雲，但台下有人再盤佢：定係公民黨？佢即刻窒咗，唔識回應。