本周四舉行嘅《新城勁爆頒獎禮》，馮仁昭收到可靠消息，賽果冇驚喜，繼續由陳奕迅（Eason）同容祖兒冧莊做大贏家，佢哋各奪四獎，仲雙雙成為全球勁爆男、女歌手六連霸。
祖兒六連霸
年年派獎嘅新城，今年同樣勁派過百獎項，不過馮仁昭聽聞今次玩新制，竟然同無綫一樣奉行唔到冇獎新例，據知古巨基同李克勤都唔去《勁爆》，所以齊齊食白果，基仔喺《叱咤》形勢已經告急，估唔到佢率先缺席勁爆嚐捧蛋滋味。去年基仔已經諗過今年唔再玩頒獎禮，不過俾英皇㩒住，但觀乎家形勢，難保基仔對頒獎禮意興闌珊。
講番賽果，除咗六連霸嘅Eason同祖兒，林峯、蔡卓妍、吳雨霏、G.E.M.、Mr.、張敬軒、孫耀威各有三獎，其他如方大同、周柏豪、陳偉霆、鍾欣桐、黃貫中、王祖藍、薛凱琪及鍾舒漫等均人人有獎。
撰文：馮仁昭