正在上映的電影《我老公唔生性》，阿Sa蔡卓妍為老公鄭伊健扭腰擺臀，大跳鋼管舞，作為他的生日禮物，不料咔嘞一聲，用力過度扭傷腰骨。
現實世界中，真有師奶為老公跳鋼管舞，Bowie甚至在睡房安裝鋼管，頂天（花板）立地，晚晚送禮給Honey，表演倒掛金勾、擘脾轉圈，「我老公覺得我好索！」
幸福非必然，Brenda是老細級人馬，同樣鍾情鋼管舞，但老公不解溫柔，只問：「你咁大隻點解飛到上去？」女兒當自強，她把心一橫將中環辦公室變作舞池，晚晚立竿起舞，送禮給自己。撰文：潘婉玲 攝影：胡堅
挺胸翹臀、張腿倒吊、身體跟隨節奏擺動，連串動作猶如雜技表演，是鋼管舞的指定動作，雙臂稍欠力度，分分鐘撻落地骨折；身體不夠柔軟，也會落得與阿Sa同樣下場。記者與阿Sa同年，為了這次訪問，幾個月前上了一堂鋼管舞課，最後不出所料，性感欠奉，雙臂痠痛持續好幾天，跟鋼管的霧水情緣也就此終結。
我等後生女吃不得苦，而現年47歲的Bowie殷寶儀，卻讓一眾後輩汗顏，記者提議用《江南Style》作伴奏，Bowie二話不說上管獻技，一曲既終，只帶點微喘，眉頭不皺。
她人到中年，逃過發福，三圍34、26、35，身高160公分，體重105磅，穿着緊身衣搔首弄姿，有意無意露出腰間火辣辣的紋身，看上去倒像後生女，原來從小爬樹上屋頂，這種「擒高擒低」的本領與生俱來，五年前接觸鋼管舞，一攬便再也放不開。
新婚甜蜜寧攬鋼管
記者自作聰明，以為她與鋼管夜夜廝磨，目的不外乎提升自信，「我一向好有自信！」那一定是博老公注意吧？「我哋今年4月先結婚，仲好熱戀喎！」自信爆棚，新婚甜蜜蜜，卻不攬老公攬鋼管，有古怪！「我轉咗做文職之後，太多精力，唔做運動瞓唔着。太激？我就係鍾意佢夠激！」
她本來任 職經理，周末也忙於工作，冷落Honey，五、六年前毅然轉做朝九晚六的OL。工作雖不起眼，跳舞卻可稱后，去年贏得香港國際鋼管舞雙人組冠軍。
「後生女擘大腳都唔敢」
Bowie一周三課仍不夠喉，乾脆在睡房安裝私伙鋼管，夜闌人靜正是showtime，扭動蛇腰與鋼管共纏綿，德國籍丈夫是其頭號兼唯一粉絲，每次都現場拍攝，在朋友面前晒命。Bowie說：「外國人有個靚老婆，會拖住佢出街，話畀人知：『我老婆呀！』，中國人就想冚住：『唔好望呀，我太太嚟㗎！』」
「你可以學，但唔可以表演畀人睇！」目前已是兼職導師的Bowie，教過不少學生，有學生最後因為男友或老公這句話而放棄，即使堅持上課也猶抱琵琶半遮面，比內地佳麗更保守，「好多啱啱嚟學嘅女仔，連擘大對腳都唔敢，膝頭會黐埋」。
記者啟稟「舞后」，天下港女出我輩，看似前衞，實質迂腐。她道：「喺街見到好多女仔行路時背都挺唔直，後面睇以為佢上咗年紀骨質疏鬆。」老娘越罵越有火：「個個風格好似，都係可愛、公主，化妝化到一樣樣，興乜嘢着乜嘢！」
與鋼管長相廝守的還有Brenda翁惠芳，兩人於課堂上結識，年齡相若，因此格外投緣，經常合演空中吊環兩相飛，以及雙人旋轉鋼管舞（Spinning pole）。Brenda在中環開設外傭介紹所，安裝了價值3,000元、從上海訂來的旋轉鋼管，將辦公室變成舞池，不時相約Bowie上來「掛臘鴨」，不用Saturday night也可fever（狂熱），「唔可以一個人跳，驚撻親冇人理」。
Brenda體重高達130多磅，腰腹得天獨「厚」，因此舉手投足不及Bowie輕盈敏捷，耐力也稍遜，拍照時好幾次催促攝影師：「得未呀？快啲啦，冇力喇！」只怪攝影師追求完美，連累她氣喘連連，「以前太瘦，得80幾磅，所以係咁食，結果家肥得滯！」
Brenda雖然身為老闆，在舞池上卻慣處劣勢，多年來苦心孤詣學舞，可是老公從未現場觀賞，也沒半句稱讚。她上過美國舞蹈雜誌，老公引以為榮嗎？「咁都威嘅，我咁大隻都上到去（鋼管）！」總有片言隻語的鼓勵吧？「到我表演前叫我食少啲嘢，否則凸咗個肚腩出嚟！」
老公雖然不讚賞，起碼沒有打擊士氣；同學見她磅數不少，也不嘲笑，「邊個會柴我台呀？我係佢哋目標，我咁大隻，啲妹覺得：『你做得到，我都要做到！』」
老師歧視肥人燃鬥志
老師對她卻不客氣。現時香港只有兩間學校教Spinning pole，曾有老師嫌她胖，認定她做不到高難度動作，拒絕指導，也不准她升班，勒令留級重讀。「我好嬲，你都未教，點知我做唔到？」也難怪，同學大多數是20來歲的後生女，體態輕盈，不時出外表演，為學校「省招牌」，「佢要啲妹，要sexy，歧視肥人！」難道Brenda以肥為榮？「係呀，但嗰度以sexy為榮嘛！」
一怒轉校，為食照舊，辦公室放了兩箱汽水，絕不為跳舞減去腰間贅肉，「冇食嘢我覺得會冇力上去，其實都要好大力」。天下肥人何其多，Brenda勉勵肥人當自強，別教人看扁，「我肥，大隻，但我做呢啲動作靚，咁就ok。要有自信心，千祈肥、老都唔好俾人睇小！」