本來落敗立法會嘅劉江華如今做咗副局長，不過最慘都莫過於沙田田心選區嘅選民，當日錯誤相信劉江華會為佢哋做區議員，但佢旨在參選超級區議會，選唔到、有官做就一腳伸開沙田選民，正一反骨仔！
社民連為民請命，即時喺劉江華獲委任做副局長當日，走去佢辦事處貼咗張「民建聯最無恥」嘅橫額出嚟，批評佢「選舉得個樣，榮升副局長」。據聞，除咗讓路畀劉江華出選田心嘅公民力量潘國山會參選外，社民連姜靈彰、民主黨丁士元都有意問鼎呢個議席，連人力袁彌明都心郁郁。有泛民中人就覺得如果多過一人想去馬，不如先搞個初選機制，以免好似上次馬鞍山補選咁，益咗建制派。