早排立法會召開新界東北發展公聽會，調理農務蘭花系幹事莊明堅慷慨激昂嘅發言技驚四座，好多浸緊溫泉嘅青蛙都俾堅叔嘅霸氣嚇醒咗。為咗畀一眾想喺元旦一齊向狼振英講下調理農務嘅「農友」霸氣上身，蘭花系上星期印製系Tee，聲稱原價$9,200減到80個大洋有交易，首批300件火速售罄，可以預期，元旦日一定人頭湧湧！
堅叔一句「點解我哋調理農務都咁難」，YouTube點擊率有成40萬。蘭花系「施肥員」Barry話，facebook個群組本來得10零人，堅叔發言之後咋咋聲加到300人，於是設計系Tee搞gimmick，希望大家開心抗爭，「如果政府再有乜惡行，個個禮拜有衫出」。
中產階層撐潮Tee
Barry證實，當日篇發言稿係蘭花系幹事集體創作而成，平日口窒窒嘅堅叔好有火，分零鐘陳詞擲地有聲。佢又話，堅叔曾經賣過電話、做過司機同實Q，但佢真係業餘種蘭花。
從事地產業嘅Barry話，平時唔理政治嘅典型中產，近排都開始覺得管治班子不堪入目，「連咁多人憎嘅劉江華都做到副局長，政府係咪嫌唔夠多人上街？」訂Tee嘅送貨地點，居然有半山干德道、淺水灣同舊山頂道，希望多啲人着住件Tee上街，「等ＣＹ難堪下都好」。
mailto:[email protected]