中原集團創辦人王文彥位太座周春嬌不愧係「炒樓天后」，政府推出雙辣招，似乎對人稱「Lisa姐」嘅王太冇乜影響。市傳佢啱啱透過公司轉讓形式，以3800萬沽出尖沙嘴九龍站天璽一個單位，賬面勁賺1520萬。
地產代理界噚日瘋傳，Lisa姐09年12月以2280萬買入天璽月鑽璽1374呎高層C室單位，剛以3800萬轉公司賣出，呎價2.77萬。王太當年都係透過公司轉讓形式買入呢個單位，慳咗86萬釐印費，呢1520萬幾乎可以話係淨賺，仲避埋BSD！
不過，王太唔認賺咗咁大筆錢，話「冇賣喎」，跟住又解釋話係由阿囝處理呢個單位買賣，佢唔知咁多。市傳負責呢宗買賣嘅利嘉閣亦冇認。有熟悉豪宅買賣嘅經紀不以為然，仲話：「炒樓賺錢都咁高調，唔怕稅局追稅咩，係我都唔認啦！」