男人老狗姿姿整整已經無謂，足球員姿整就衰多幾錢重。話說韋根前鋒迪山度，上周六主場對阿仙奴，就戴住耳環落場，下半場俾球證發現，要佢離場除咗佢；雖然迪山度同韋根職員好快就除咗對耳環，但都要等死球先再入場，白白企成3分鐘。當時球隊落後緊，仲少個主力，領隊馬天尼斯唔嬲就假；據報賽後嬲到唔同迪山度講嘢，睇嚟呢位阿根廷前鋒隨時被雪。