又到聖誕，又到聖誕，女友份禮物就梗係要買。現代男女無論幾財政獨立，甚麼都不缺，聖誕都恨有禮物收，就算口說「感情不是用錢來衡量」，但事實上當大家唔肯定喺對方心中的地位時，通常會自動將件禮物「量化」。
有此特質其實並不是港女的專利，《每日郵報》早前引述一項調查，發現英國女性對另一半所送的禮物期望都好高，量化後的答案，是希望對方用半個星期的人工（平均為3700港元）買禮物畀自己；男人要求低一點，希望女友送約1940港元的禮物。
Samantha認為這不是貪慕虛榮，只是女人更清楚男人的心理──男人鍾意你時，畀埋條命你都得，唔鍾意你時，要男人在自己身上花錢，就等如攞佢條命！歸根究柢，女人都希望藉着份禮物了解自己有幾重要啫，假期前炒少陣，花點心思買禮物送畀心愛的人，甜甜蜜蜜咪幾好。祝大家聖誕快樂！
Samantha
本欄逢周一、三、五刊出