上周五晉佳分析風電業，預計相關股份業績已經見底，相信龍源電力（916）、華能新能源（958）同大唐新能源（1798）都唔會例外。
今日集中講華能新能源同大唐新能源，兩隻都係大型電企嘅分支，以風電業務為主。今年上半年盤數都幾相似，收入分別增長11.9%同8.3%，但係折舊大增約四成，財務成本分別增加80%同36%，拖累盈利分別下降63%同76%。
當年行業粗放式投資，令個別地區發電量過剩，唔能夠上電網而要棄電。不過，呢批過剩產能已經投運得七七八八，明年開始，新產能會較多投放喺冇限電問題嘅地區，加上目前風電投資須經中央嚴格審批，唔由得企業亂嚟，相信將來新增產能普遍能夠真正帶嚟收入。與此同時補貼亦增加，所以香港上市嘅風電股收入會有更可觀增長，能夠抵銷成本增幅嘅機會幾大，盈利可望回復升勢。
地域分佈佔優
唔同地區嘅舊業務比例，就成為未來業績分野嘅關鍵。根據麥格理8月發出嘅研究報告，雖然華能新能源喺棄電重災區內蒙嘅裝機容量比例，佔整體35%，但冇受限電影響嘅東南部，佔比亦算高，達到28%，所以衰唔晒。至於大唐新能源，內蒙業務比例比華能新能源更高，達到44%，東南部就只得15%。因此地域分佈方面，華能新能源較有優勢。
論估值，兩隻股市賬率分別係0.75倍同0.6倍，均有長遠盈利能力，但面對差勁嘅行業經營環境，市賬率不足一倍，都仍然合理，不過，呢個估值未充份反映利好嘅政策面，同出年經營環境改善嘅因素，所以中長線有上升空間。上述兩股當中，晉佳比較睇好華能新能源，中長線以市賬率1.2倍作為目標價，上望兩蚊，可升62%。
前排龍源股價一突破阻力就配股，相信會令部份投資者反感，有點兒美中不足。基本因素方面，龍源盈利能力比上述兩股高，但估值亦相對較貴，市賬率1.2倍、市盈率12倍，都可以考慮持有。
晉佳
本欄逢周一、三及五刊出