湯寶如（湯記）前晚在紅館舉行「湯寶如20年零一夜狂歡演唱會2012」，戴夢夢、林建名、張學潤等捧場。雖然只開三面台，但仍只得七成入座率，湯記坦言：「過咗世界末日最沮喪時期，新紀元開始。但有啲朋友今晚先至嚟做冬，即使我畀飛佢都唔嚟睇，好唔畀面，不過唔緊要，全部都係我嘅好朋友。」
紅裙似女鬼
湯記全晚換了五套衫，更與男舞蹈員跳辣身舞，還掃落對方大腿胯下，惹人遐想。與湯記同為寶麗金年代的小花黎瑞恩和劉小慧重遇舞台合唱《友共情》，雖然黎瑞恩在樓梯仆親，但仍堅持續繼唱，小慧難得穿上低胸裝騷三吋事業線，她笑說：「叫我做嘉賓其實好驚，次次俾人影到我哋好似肥花咁。」還有阮兆祥、草蜢擔任嘉賓，祥仔取笑湯記的紅色晚裝：「七月十四着可以嚇走啲人。」
喊爆謝歌迷
演唱會尾聲，湯記忍不住喪喊半跪答謝到場的歌迷說：「多謝每位觀眾，無論係買或送飛都多謝，我唔知會唔會繼續唱，可能演唱會後消失。」有Fans大嗌支持，她亦承諾明年復出再唱。慶功時湯記透露男友及兒子均有低調捧場，問明年會否結婚？她說：「未必住，愛對方就得。」
採訪：王連連
攝影：仇志德