股神畢菲特名言：「在忍無可忍的時候，再忍一忍。」意指投資者即使做足功課，入貨後好多時仍會坐艇，或者橫行不動，望着其他股票飛升，究竟是換馬追入爆升股？定係等多陣？
炒股數年，魏力已無數次面對這種困境，由於「唔執輸」的心態作祟，十次有八次都會沽持倉，然後飛身撲向已開動的高速列車，但結果多數係：列車突然煞停，而掟出街的舊愛就突然井噴，燈神就是如此煉成！
如此這般多輸幾次，個人自信心肯定重創，分分鐘從此退出缸湖。其實既然入市前做好分析，持股亦未跌穿止蝕價，何不多忍一會？今年魏力曾兩次推介遠東環球（830），但每次疑似破位後追入都中伏，股價又回落至橫行區發呆，點算？
炒此股前要緊記，這是中海系的股票，論往績，中國海外（688）、中國建築（3311）、中海宏洋（081）隻隻升爆廠，中海分工清晰，買起遠東環球，日後篤定為系內各項目的「幕牆負責人」，大樹好遮蔭，定單絕對不愁，股價爆升屬時間問題，關鍵係──您有冇耐性坐？
該股周線圖早前下破橫行區後，翌周即重返其上，為利好之兆，上周有大成交開車迹象，買入或加注均相當值博，先睇兩蚊，明年以一倍升幅為目標！
魏力