擁有歐洲人血統的曹查理神采飛揚，他自言手提電話從不會轉，怎看都不像已經62歲，他自嘲可能近年沒有再拍三級片，人亦變得祥和：「係啲爭人錢驚俾人追數啲人先成日轉電話。可能拍少咗鹹片，個樣冇咁鹹濕，好似話我阿爺嗰代有蘇格蘭血統。」
三曲走天涯
近年曹查理以客串性質拍電影，早前拍過杜琪峯監製的電影《報應》，他表示都是玩票性質，正職是在內地登台及跟朋友合作翻修西貢的別墅出售，他說：「登台係食老本，原來啲內地人睇好多以前我嘅三級戲，特別係同外國艷星大戰劇情，尤其係同村上麗奈套《卿本佳人》同《我為卿狂》，佢哋直情當我民族英雄。」
曹查理笑言去內地登台三首歌就可以走天涯：「識唱《上海灘》、《愛拼才會贏》同《別讓我一個人醉》三首就夠，佢哋都係想見吓我玩吓遊戲，每次上去帶啲我嘅戲影碟送畀佢哋，就已經好開心。」現時的曹查理以享受人生為樂，興之所至會飛到日本，專為打心愛的彈珠機：「未入行前做鑽飾生意喺日本住過一輪，愛上打彈珠機，所以得閒就會買張機票過去玩幾日食吓好嘢，睇吓脫衣舞表演，享受自己嘅生活。」