市場競爭威力真係唔講得笑，強積金半自由推出個多月，MPF市場已起明顯變化，上周先話最不思進取嘅國壽，都推上網轉換基金功能，而滙豐則下調旗下14隻基金管理費。受託人一來驚現客仔跳槽，另一方面又想人哋嘅客仔過檔，大家必然鬥服務、鬥收費、鬥表現，相信減價、轉會優惠陸續有嚟，欲轉會不如再等等，明年才決定。
毛丘認為，揀受託人首要考慮是投資表現，其次才是收費。如果表現好，畀多少少當貼士有乜所謂。但如果買靠收息嘅保證、債券、貨幣基金當然是收費行先，因為收費高低直接影響回報。以保證基金為例，滙豐的開支比率2.79%，頭11個月回報只有1.72%，即係你收嘅息大部份落咗受託人個袋；信安的開支比率1.33%，回報6.06%，講多無謂，數字最實際。
魯毛丘