最近因為腳痛，所以遍訪名醫，由針灸到電療至土法按摩乜都齊。腳傷未好，但一眾名醫的講法都是眾口一詞的：「唔好跑步啦，唔好踢波啦！」其中一個更極端的話比我知跑步直頭有害身心，「健康？跑步就唔健康啦，你睇吓果啲猝死嘅本來咪好健康，跑跑吓就去咗咯！」佢講嘅時候雙手正按着我的腿，為了自身安全，惟有應佢有道理云云。
唔會唔跑，不過就住跑就應份嘅，腳踭痛，於是重新學習用腳前掌跑；又因為跑得快會痛，於是乎就慢慢走，唔使急，最緊要郁！因為跑得慢，也因為想分心忘記腳痛，所以早上在那塊擁有大草地的運動場上，看見了很多平日沒有留意到的健兒們，個個都型到痺！
最搶眼的首推羽毛球嬸嬸隊，幾位嬸嬸其貌不揚甚至運動衫都冇換，但一拿起球拍就立即好像上身般「抽波」，而佢哋兩個一組搓波的難度在於──腳唔郁，手係咁易郁，就可以打到個波，可以肯定佢哋都係經過長年訓練默契，用佢哋呢套規則的話，恐怕黑妹都要輸。
出嘅自信笑容，絕非平日街市裏面的主婦們可比，而人群中總有一兩個係啱啱加入跟唔到beat，但佢哋都好盡力跟，回頭望望樹底另一邊有位叔叔在壓腿，嘩，佢條腿並唔係放在地上，而係放在垃圾筒上面，可以話係物盡其用。我掛住望旁邊差啲撞着前面位姐姐，「Sorry sorry！」我道歉都來唔切，亦都真係服咗呢位姐姐嘅倒後行技術，倒後鏡都慳番。
走多兩步，同一張櫈又係坐住同一位阿叔，無論噚日咁熱今日咁凍，佢一樣除晒上身嘅衫盤腿而坐，閉目養神，唔知佢係練緊功定係show緊肌肉嘞。諗諗吓之際腳邊有個波碌過，本能上差啲想一腳抽埋去，好在冇出腳，因為原來係草地滾球，叔叔嬸嬸好似碌波碌得幾投入喎。
跑完睇睇錶，快過噚日少少，梗係啦，多得今日跑道上多咗個美少女，唔通我會跑輸比佢咩！不過再係咁夾硬跑，遲啲可以改行跟叔叔嬸嬸玩第2樣運動嘞。
keyman
now TV主持
mailto:[email protected]