上周五紐約人喺主場同公牛上演東岸傳統大戰，客隊110:106險勝。不過場波打得好激烈，兩班球員仲幾乎講手，搞到球證係咁趕人出場勁唔得閒；兩隊夾埋有5個人被逐，主隊教練活臣爆粗鬧球證隨時要停賽，聖誕大戰對湖人有可能見佢唔到㖭呀！
呢對喺80年代就已經成為宿敵嘅冤家，緊張關係其實喺2000年後已經淡化咗好多；最主要都係因為兩隊戰績下滑，冇乜人再會講兩隊喺80至90年代季後賽遇上都會打得好鬼激烈。今季紐約人開季又開得咁鬼好，公牛冇咗戴歷路斯都依然全力搏盡，今場打起上嚟兩隊完全唔留力，勁有90年代嗰種緊張。
安東尼兩技犯出場
公牛喺今場波一度試過領先25分，話晒紐約人係今季主場王，之前只係輸過一場咁大把，今次落後咁多，梗係越打越有火。第4節仲有7分鐘，安東尼hard foul搶到進攻籃板嘅諾亞，前者唔服氣講咗兩句，球證二話不說就送個技規畀佢；因為之前安東尼已經有一個T在身，所以被趕出場。教練活臣見到火都嚟埋，出去同球證理論，越講越火仲爆埋粗！結果球證梗係趕佢出場求個耳根清靜啦，主場球迷唱反調喪拍手掌畀行出場嘅活臣。
安東尼賽後都認今場球隊冇控制好情緒：「我喺球員通道聽到觀眾係咁嗌，之後就見到活臣喺我後面。入返更衣室沖完涼出嚟，又見到真達拿坐喺我隔籬，喺嗰時自己先發覺，今晚場波真係打出火。」真達拿都俾人趕出場？冇錯，不過唔只佢一個㗎，另一位主角又係諾亞。
活臣爆粗或停賽
話說安東尼離場兩分鐘左右，主隊老將傑特喺一次進攻射入3分波，但係等搶籃板嘅諾亞起勢想㩒住真達拿，後者俾人㩒到火起，一手甩開諾亞，仲行埋去好似想打佢㖭。兩人都要隊友拉開先至冇事，球證討論過之後，決定送佢兩個出場。連埋因6犯離場嘅史JR史密夫，今場有5個球員被逐。最後公牛雖然贏4分，但就俾主隊追到氣咳，贏得都幾險。至於活臣今次罰錢就肯定㗎啦，不過爆粗鬧球證咁大件事，聯盟隨時停佢賽，聖誕對湖人冇咗佢嘅話，紐約人都幾麻煩。