【生意難做】
獨市進口內地活牛的五豐行今年第六度加價，每擔活牛批發價今日起加至4,105元，比去年同期貴47%，肥牛更加至4,310元的歷史新高。牛肉檔及食客叫苦連天，有肉檔老闆擔心活牛無止境加價勢令大量同業「捱唔住」出現結業潮。堅持用鮮牛腩的麵店硬啃加幅，「唔敢加太多，驚影響啲客源」。
斤半牛腩售$160
活牛批發價不停加，部份成本轉嫁到消費者。北角街坊周太稱年初買斤半牛腩「100蚊有找」，昨天買同樣份量卻加至160元，「貴咗好多，所以都食少咗，會轉食平啲嘅豬肉」。愛吃牛的張先生亦指，牛肉太貴惟有忍口「食少餐」。他希望政府出手打破進口活牛獨市局面，「有競爭，有人同佢搶自然會減價」。
鵝頸橋街市牛肉檔主何先生指生意難做，牛肉零售價由年初每斤60多元，加到現時每斤96元，銷量下跌逾三成，「家都係吊住鹽水吊命」。面對批發價再次上調，不排除零售價稍後要加至每斤過百元，擔心不少同業將「捱唔住」結業，「過埋年（農曆新年）都唔知執幾多檔」。
北角街市牛肉檔主陸先生亦指，迫不得已調高零售價，「加得多驚冇咗啲客，唔加我哋又會蝕本，我哋都要食飯㗎」。他希望政府盡快開放進口牛肉市場，「冇第二個供應商，（獨市）一定係咁㩒住你搶！」
大利清湯腩負責人譚女士稱，即使加價壓力沉重，今年只加了一次價，淨清湯腩由60元加至65元，「唔敢加太多，驚影響啲客源」。
《蘋果》記者