政府宣佈落選立法會議員劉江華獲委任為政制及內地事務局副局長，襄助譚志源，泛民一定大皺眉頭。呢位先生對內地可能好有聯繫，但聽佢多年來在立法會發言，似乎有專門責任對付民主派，佢在超級區議會選舉輸咗之後，左派報紙不無惋惜之意，遺憾民建聯/工聯會一眾立法會議員之中，以後冇咗一支「劉大炮」，新人仍待歷練等等，可見左派對佢十分重視。
冇咗幾萬蚊議員人工，做副局長攞番18萬以上，劉江華飲得杯落，負擔得起晚晚飲勝，但此君與梁振英一樣，性好辯，嘴巴不肯饒人，坐在要害職位，設計2017年特區如何特首普選，選舉方法及規則對香港有極重大影響，譚志源主理，市民還可有所憧憬，但加入劉江華為副局長之後，大家就發夢唔駛咁早咯。且看梁先生上京見習近平，在習面前嘅發言，十足十係內地地方省委書記咁嘅模樣，劉江華係佢枝針，放在政制及內地事務局，那會放鬆對2017年特首普選之控制！
梁先生十分識得看風駛，例如放棄與私人業主硬碰硬嘅（何東花園）及轉軚打林鄭月娥一巴掌（保育中區政府合署西座），顯見佢轉身之快，但如此一來，轉膊唔切嘅公務員及若干諮詢委員會成員無不搭車撞到焦頭爛額，怨聲載道。前幾日碰到一位知情人士，佢話關於重建西座一事，兩年多反覆討論，城規會已批准了重建圖則，整個建築佈局及綠化面積，比現時之殘舊西座靚得多，更加善用土地，點知梁特首及行政會議一下子就全盤推翻，決定唔拆西座，於是過去一段時間為重建計劃絞盡腦汁嘅上下官員及「專業人士」，個個為之愕然，士氣大挫。一啲官員出席地區諮詢論壇講地區項目時，竭力為政策辯護，話政府會貫徹到底，冷不防有地區人士插一句：「唔好講得咁大聲呀，你哋梁老闆一聲令下就會轉軚啦，轉咗你都唔知呀？你憑乜嘢向我哋保證乜乜不變？」在如此場合，官員為之語塞，又冇梁老闆講「開誠布公」嘅天份，幾乎默然無語，知情人士話：「做官咁多年，我哋都係研究最快幾時可以退休最實際！」