若說聖誕節的主菜是看燈飾、唱聖誕歌，你都不信啦！當然是食飽、交換禮物同直落狂歡！十一月中時屯門時代廣場和香港家庭教育學院，以電話訪問了782名中小學生家長，及763名中小學生，七成五受訪小學生認為食聖誕大餐同送聖誕禮物為聖誕必備活動。
講多無謂，食飽才是最實際。
記者：陳慧敏 攝影：蔡家輝、潘志恒
模特兒：Fanny Ng@Pure Models
紅遍西環43年
11月開始，報紙雜誌日日洗腦式搜來全城聖誕大餐。這些留待食版同你解話，追根溯源，我們有43年歷史的正宗聖誕大餐！
12歲做酒店出生，紅遍西環的森美，40歲時自立門戶開餐廳，到現在83歲，其實都未見過聖誕正日的中環及尖沙嘴大街夜景。1969年開業第一年，他在餐廳裏舉辦當年少有的聖誕自助餐，每位收費6、7元左右，價錢相宜，然而一開門他就後悔了：「嗰時好多客人來食，一個阿婆畀二人份入場費，話俾兩個孫仔食，但孫仔又夾埋畀阿婆食，個阿婆又話『我無食呀！』咁，你都唔會同佢計較咁多。仲有當時一盤盤食物由廚房捧出來（食客）搶住食，食唔完又倒！做咗一年驚咗，以後都唔敢喇！」
1970年起，正式轉做聖誕套餐。沿用在酒店學來的正宗聖誕套餐流程及餐單。森美女兒Iry：「唔使諗架啦，就係火雞同火腿。老一輩嘅人好堅持，唔願改變傳統。」燒美國火雞火腿，本來用雞肝弄成醬汁，但去年起改以鵝肝醬作汁，白菌、蘑菇炒鵝肝，雞味重的火雞，配上鵝肝醬就特別香。主菜份量都有8－9安士，配上餐湯、兩道頭盤及甜品，連一杯特調雞尾酒、咖啡或菜。一個套餐剛好將一張雙人枱鋪滿，必食森美特製的聖誕蛋糕。每年聖誕前兩星期，他就用酒將橙、柑、提子醃過，加Rum酒成為英式的聖誕蛋糕。
緬懷風光事
講起威水史，森美同女兒Iry的故事，一直倒帶回到97前：「97年以前所有香港政府各部門都幫襯我。我們的火雞每年都在美國訂購的，每年聖誕都訂四十多隻，各二十多磅的火雞。現在少了些都要訂三十多隻。一到平安夜嗰日，廚師、樓面、經理全部都要出去，24、25號舖頭就唔做生意喇。仲有我哋曾去過伊朗領事的家辦到會，用最貴價伊朗嘅魚子醬，佢哋大大罐擺響度，任由外國人大匙大匙咁舀，好開心呀！」
6、70年代這樣食一餐，廿幾蚊應該好貴。不過當時的人而言，食一餐係個好好的慶祝節目。平時死慳死抵，到大時大節時打扮靚靚，與家人一起食餐好的，一道甜薯的味道已印記心底。森美為每位客人準備了禮物包，外國人會立刻載上裏面的面具玩鬧，港人多數收入袋就算，氣氛就無咁好。好多客人都是孩子時來食過，長大了又帶埋父母孩子三代一起來重溫舊事，相對今日，食得Easy又夠濫，回憶，太多也太雜。
森美餐廳
地址：西環皇后大道西204-206號
電話：2548 8400
超豪 2蚊11道菜聖誕大餐
50年代我們不叫聖誕節，叫耶穌誕。耶穌誕公公即是家嘅聖誕老人。那個年代，去中環看到燈飾已經覺得好驚為天人，好新鮮。街頭的小店都在賣閃閃吓嘅燈飾。聖誕卡，一毫子張，睇到歐式屋企覺得特別靚。
因為森美「硬頸」，所以你到今日仍食到近半個世紀前的傳統聖誕大餐餐單。但係五、六十年代的香港，打工仔覺得聖誕節即是鬼佬冬至「老番冬」，想趁熱鬧食聖誕大餐，未免都想認吓叻。普通餐廳都有「聖誕大餐」食，而且一蚊兩蚊已經有11道菜，聽落都夠威！本地收藏家及歷史專家鄭寶鴻：「由50年代至60年代初，香港市民已經好流行去普通餐室食聖誕大餐。主菜多數係牛扒，套餐會比平時多一點配菜，或配火雞來應節。11道菜連牛油、麵包、餐湯、咖啡，連同主菜、薯仔、碟邊的幾條豆角都各計一道。其實都係搵老襯。」
40年代 潮掃超市聖誕禮物
現在我們都係等聖誕大減價，掃名牌套裝做聖誕禮物。除了送聖誕卡，由40年代中期起，市民都流行交換禮物，不過禮物都買得好實際。鄭寶鴻：「1945年時皇室行上有家大利連超級市場（DAIRY LANK），嗰個年代還未流行超級市場。市民對入到舖頭裏看中甚麼就拿，出到門口先畀錢嘅感覺好新鮮！
60年代左右好多外國人幫襯大利連，買Fry's富麗絲的朱古力，藍罐曲奇同人交換聖誕禮物，連員工都戴晒聖誕帽，當時覺得好巴閉，好外國。1946年在大利連旁邊又開了家差不多形式的惠康辦館，70年代置地收構了大利連，兩間超市變成聯號，90年代正式合併，變成今日大家去慣的惠康。」
最怕醉酒鬼
食飽飽，又有禮物，逛完燈飾，直落去蒲吧玩天光囉！
40、50年代，去金鐘真係一身蟻：「以前啲親友住灣仔，我就住中環，中間一定經過金鐘道。當年金鐘道仍叫皇后大道東。道上有好多酒吧。由12月20號至24、25號，一般人都會視金鐘道為畏途。因為啲水兵呀、醉酒鬼呀係咁拿啤酒樽亂扑人！雖然都有憲兵巡來巡去，但當時五六十年代華人地位好低微，俾人扑到，淨係講句『頭上開花』就算啦！」
