喺日本卡通《蠟筆小新》入面，小新嘅紫菜粗眉好過癮，估唔到現實生活中竟然有狗仔同佢鬥粗！話說美國女星雲妮莎夏芝絲（Vanessa Hudgens）早兩日幫朋友放狗，佢一個人拖住兩隻狗去到紐約華盛頓廣場公園，兩隻狗好聽話，任雲妮莎摸之餘，又企企問佢攞嘢食，最頂癮係其中一隻居然係蠟筆小狗，條眉粗到同小新有得揮。雲妮莎仲幫兩隻狗扮靚靚着粉紅色衫，差啲以為佢先係真正主人囉！