黎耀祥三奪無綫視帝，令當時在現場的馬國明O晒嘴，之後有指林峯對失獎感不滿，祥仔昨日說事前其實打定輸數：「我都好愕然！預咗今年恭喜林峯。」郭晉安則認為祥仔奪獎實至名歸，還暗寸林峯說：「如果係計粉絲多，不如整個粉絲多大獎。」
今年無綫頒獎禮黎耀祥三奪視帝，令有份角逐的馬國明即場O嘴，之後有指林峯對失獎感不滿，更有傳他因此扭計不肯拍無綫劇。
批評較似歌手
對此，昨日在將軍澳電視城開工的郭晉安說：「如果係計粉絲多，不如整個粉絲多大獎。以演技為準則嘅話，祥仔當之無愧。其實可以睇吓點呵番佢（林峯），開多十場演唱會等佢賺多啲錢先喇。佢家似歌手多過似演員，如果要多方面發展真係要比人花更多時間精力，歌影視三棲真係唔容易去捱。」
祥仔昨亦於將軍澳電視城開工，談到三度奪視帝，他說：「我都好愕然！預咗今年恭喜林峯。」祥仔又贊成無綫公開賽果：「無綫搵會計師樓監控，結果出嚟都俾人話造馬，咁對無綫唔公平，亦係侮辱，與其唔係軍事機密，咪公開囉！」
有指林峯及徐子珊因失落視帝視后扭計不拍劇，祥仔說：「唔會，點會呀，無綫唔係大家想像中咁，由我哋控制。」另一傳言指祥仔自稱粉絲多過林峯，祥仔說：「我哋咁成熟，點會講呢啲嘢，林峯嘅粉絲梗係多過我啦。」
祥仔勸睇開啲
對於有傳林峯與粉絲不滿賽果，祥仔表示：「我覺得阿峯會好明白，佢喺呢行做咗十幾年，我覺得佢好努力好踏實，獎每年一個，今年唔攞咪出年攞，可能粉絲情緒大啲，因為鍾意得阿峯先會反應大，希望大家睇開啲。遊戲梗有輸贏，唔使太着緊。」
採訪、攝影：楊潔雯