當大家睇到這篇故事的時候，恭喜各位，我哋已經安然度過傳說中的世界末日，創造奇蹟。講到奇「則」，香港地從來不缺，說的是千奇百怪的樓盤圖則，真係估都估唔到。
攝影：謝榮耀
模特兒：Clement、Isis（Pure Models）
睇樓盤圖則多年的博客、網民及業內人士，替本刊綜合「聖誕奇則」，在限量限呎政策下，加上發展商賺盡之真理，奇則隨時源源不絕。以下奇則，部份已被市場普遍接受，見怪不怪，香港真係多奇蹟！
外星襲地球
香港物業，外形穩打穩紮，稀奇古怪的不多。經常行遍全港睇樓的樓市博客「地產小子」就話，香港買家追求四正實用，與外國物業其實分別不太大，「外國不乏古怪屋則，但大前提是地方夠闊落，咁就冇所謂啦，可以用設計補救。」
除了四正型，圓圓滑滑、流線型的屋則都常見於豪宅，例如九十年代前後落成的世紀大廈一座及寶樺臺，奇怪圖則彷如外星襲地球。而近年最奇之圖則，太古OPUS當之無愧，太古另一新盤珒然亦是一層一伙兼全屋流線型。不過上述樓盤皆屬逾二千方呎大戶，OPUS更是戶戶六千方呎，可謂點玩都得，奇怪的屋則反而成為賣點。
【則則稱奇】
中半山特別多有錢階層，居所面積動輒千幾二千方呎，雖然部份物業圖則古怪，但勝在空間夠巨。其中經典圖則之作，世紀大廈實有份，此項目有兩座物業，第二座略帶圓角，而一座更是全幢圓碌碌，最妙是超長走廊，令住客好似行咗入酒店。至於名廈寶樺臺的回力標建築亦屬經典圖則之選，單位廳房皆有角位，兩物業至今仍獲名人愛戴。
A.天外飛碟
代表作：中半山世紀大廈一座
B.回力鏢
代表作：中半山寶樺臺
【我愛騎樓】
人人熱愛大騎樓，可惜現實是大部份樓盤只有聊勝於無的蚊型露台。奇則用於大戶當然冇問題，若然連蚊型戶都玩流線型，結果就出現了「傳頌」於高登網的帝峰．皇殿「一個人的露台」；不過大家只是一場誤解，現場所見，露台其實可以企兩個人㗎！
A.二人露台
代表作：大角嘴帝峰．皇殿7座10至33樓B、D、E室
B.露台排人牆
代表作：西半山The Babington
【一屋多門】
代表作：大角嘴港灣豪庭1至9座ADEH室、10座DEH室
以眼鏡房設計的兩房戶，經常造成五門歸心（又叫五鬼拍門），大廳難區分隔局，傢俬擺位有難度，向來被視為衰則，如今見怪不怪，上水名都、新都城及沙田第一城亦見有此類圖則。但自從流行環保露台，屋內再多一道門，六門歸心應運而生。
過去兩年升幅驚人的港灣豪庭，不單止六六無窮，更奇趣的是包含了「握手位」：兩個獨立單位工作平台，中間僅隔一道欄，冇洗衣粉用時，可以問隔籬屋借用，絕對可以增進鄰里關係。不過有部份住客唔識欣賞，竟然加建一大塊鋼板做分隔，認真冇人情味！
A.親密鄰里
B.六門歸心
樓市博客：賺到盡，冇諗用家
樓市博客「地產小子」表示：「舊一輩嘅家庭鍾意兩代同堂，甚至會與兄弟姊妹同住，房間要多，但家興小家庭，已婚未婚都話要搬走，形成好多細單位嘅需求。但發展商喺開則時，除咗賺到盡，根本冇從用家角度出發，例如客廳細到可以用腳趾關電視，已經不符合視距要求。」
偏偏這類高級劏房，近年非常盛行，唯一優點就是樓底較高，可減低組合傢俬的壓迫感，但他奉勸用家要諗清楚：「買樓花咗咁多錢，點會再有能力為細單位度身訂造傢俬？呢啲單位短住三幾個月還可，但屋企雜物只會越來越多，即使一個人住都唔夠，到時擺個模型都冇地方。」將來限量限呎盤湧現，可以預期，奇則陸續來。買之前，問吓自己：你真係冇得揀咩？
【網民熱選】
代表作：何文田勝利道1號C室
350方呎的多邊形單位，竟然沒有預留位置放床。每呎萬元的單位只能放張梳化、掛個薄電視，不愧一代奇則。圖片來源：地產小子網誌
【其他奇則】
紅磡御悅
C室（272方呎）
有幾奇：號稱酒店式設計，但放不下酒店的基本設備，如床、電視櫃，廚房門後竟是掛架，內裏只能容納一個人，蹲下都有難度。可謂近年最令人驚訝的屋則。
長沙灣一號．西九龍
1座D室（1172方呎）
有幾奇：屋苑大部份單位客廳都望天井景，D室的客廳與主人套房大窗可近距離互望。內櫳長長窄窄又多窗台，即使過千方呎單位亦唔見使。
東半山OPUS
（6000至6900方呎）
有幾奇：全身扭動、僅有12伙的OPUS（傲璇），屬世界級奇則，空間功能任你定。既然是一件藝術品，當然不能以凡夫俗子的眼光視之。
屯門海譽
（1026至1179方呎）
有幾奇：窗台大到可以當床，若要求唔高，放張床褥即成，毋須訂造，又幾體貼噃。
