【特稿】
「都唔記得今日（昨）過冬至！」年約70歲的孟婆婆靠綜援過活，5,000元綜援金需醫治患病丈夫及生活所需，過年過節吃的是隔夜餸，最大娛樂則是看電視，她昨參加長者宴後說：「今日好開心，好耐冇咁熱鬧過節。」
「有人關心好啲 冇都冇法」
與丈夫相依為命的孟婆婆，坦言因忘記冬至，平日過節只能吃隔夜餸：「一向都係咁過，慳住使。」她表示，生活捉襟見肘，患病若輪不到公立醫院，需看私家醫生的話，成個月都會生活艱難，無奈丈夫最近病了，開支增加，「咁好餸，又咁多同年紀嘅老人家坐埋一齊，佢（丈夫）一定好開心。」
另一名77歲盧伯伯獨居油塘邨，他表示，因自己沒有結婚，無親無故，在港只有一名胞姊，平日過時過節，他都在街周圍蕩：「有錢買幾十蚊叉燒送飯，當係慶祝。」他續指，對冬至已經好陌生，過往會與胞姊一同吃飯。近年胞姊子女長大，加上地方狹窄，已甚少一同過節，「悶都係咁過，有人關心梗係好啲，冇都冇辦法」。
《蘋果》記者